နားဟိုင်းလုံကျေးရွာ သဲမြှုပ်နေအိမ်များကို ရွှေတူးဖော်မှု ကုမ္ပဏီက တာဝန်ယူပေးခြင်းမရှိ

သျှမ်းပြည်အရှေ့ပိုင်း တာချီလိတ်ခရိုင် နားဟိုင်းလုံကျေးရွာတွင် ရေ ၊ သဲ မြှုပ်နေသော နေအိမ်များကို ရွှေတူးဖော်သည့် ကုမ္ပဏီမှ တာဝန်ယူ လျော်ကြေးပေးမှုမရှိသေးကြောင်း စုံစမ်းသိရသည်။

နားဟိုင်းလုံကျေးရွာသည် ပြီးခဲ့သည့် ဇူလိုင်လမှစပြီး မိုးသည်းထန်စွာ ရွာသွန်းမှုကြောင့် ပြည်သူနေအိမ်များတစ်ချို့ ရေမြှုပ်သွားပြီး၊ တစ်ချို့နေအိမ်များသည် သဲမြှုပ်နေကြောင်း သိရသည်။

အဆိုပါ ရေကြီးမှုကြောင့် နားဟိုင်းလုံကျေးရွာသည် နေအိမ် စုစုပေါင်း ၃၀ ကျော် ရေကြီးပြီး လက်ရှိမှာ နေအိမ် (၃) လုံးက သဲဝင်နေပြီး နေထိုင်လို့ မရသေးကြောင်း ဒေသခံ အမျိုးသားတစ်ဦးက ပြောသည်။

“အခုထိ အိမ် (၃) လုံးက ဝင်နေလို့ မရသေးဘူး။ သဲတွေဝင်ကုန်တာ။ အခုထိက အိမ်ထဲ သဲတွေ ရွှံ့တွေ ရှိနေသေးတယ်။ ကုမ္ပဏီဘက်ကလည်း တာဝန်ယူ ဖြေရှင်းပေးတာမရှိသေးဘူး။ လျော်ကြေးတွေလည်း ဘာမှ မပေးသေးဘူး” ဟု ၎င်းကပြောသည်။

အဆိုပါ နေအိမ် (၃) လုံးက ပြည်သူများသည် လက်ရှိမှာ ဆွေမျိုး မိတ်ဆွေအိမ်တွေမှာ လိုက်နေထိုင်နေရကြောင်း သိရသည်။

ထိုအပြင် ရေကြီးပြီးနောက်ပိုင်း ကုမ္ပဏီများဘက်မှ ရေဝင်သွားသည့် နေအိမ်တစ်ချို့ကို လျော်ကြေးအနည်းငယ်ပေး သော်လည်း လုံလောက်မှုမရှိကြောင်း ဒေသခံများက ပြောသည်။

လက်ရှိမှာ ပြည်သူများက စားဝတ်နေရေး ခက်ခဲသောကြောင့် ကုမ္ပဏီဘက်မှာ လျော်ကြေးလာပေးမှာကိုလည်း စောင့်မျှော်နေကြသည်။

“ ကျနော်တို့ ကျေးရွာဒေသခံတွေကတော့လည်း မျှော်လင့်တာပေါ့။ ဟိုတုန်းကတော့ လာပေးသွားလည်း နည်းနည်းပဲလာ ပေးသွားတာ။ လုံလောက်မှုမရှိဘူးလေ။ ထိခိုက် နစ်နာမှုကလည်း အိမ်တိုင်းက မတူဘူးလေ။ သူတို့က ဒီတိုင်းကြည့် ပြီးတော့ပဲ ပေးချင်သလောက်ပေးသွားတာ” ဟု ဒေသခံ အမျိုးသားတစ်ဦးက ပြောသည်။

နားဟိုင်းလုံကျေးရွာသည် ရေကြီးမှုကြောင့် ပြည်သူများ နေအိမ်ထဲ ရေဝင်ပြီး အိမ်သုံးပစ္စည်းများလည်း အများပြား ဆုံးရှုံးခဲ့ရကြောင်း သိရသည်။

နားဟိုင်းလုံကျေးရွာသည် ရွှေတူးဖော်မှုကစပြီး နှစ်စဉ်ရေကြီးမှုဖြစ်သည့်အပြင် သဲများ နေအိမ်ထဲဝင်လာသော်လည်း ကုမ္ပဏီဘက်မှ ပြန်ရောက်လာကူပေးခြင်းလည်း မရှိသေးပေ။

၂၀၁၆ ခုနှစ်မှစတင်ပြီး နားဟိုင်းလုံကျေးရွာသည် ရေကြီးလာပြီး တစ်နှစ်ထက်တစ်နှစ် ရေကြီးမှုက ပိုဆိုးလာပြီး ပြည်သူများနေရာသစ်ပြောင်းရွှေ့ရန် အတွက် ခက်ခဲနေသေးသဖြင့် ထိုနေရာတွင်သာ ဆက်လက်နေထိုင်ရကြောင်း သိရသည်။

ကုမ္ပဏီဘက်မှ ကူညီပေးသော်လည်း အနည်းငယ်သာရသောကြောင့် နေရာသစ်သို့ ပြောင်းရွှေ့ရန် အတွက် မြေကွက်ဝယ်ယူရာအတွက်လည်း မလုံလောက်ကြောင်းသိရသည်။

#SHANNews