စင်္ကာပူနိုင်ငံလောက်ရှိသည့် မြန်မာနိုင်ငံက တရားမဝင် သတ္တုတူးဖော်ရေးလုပ်ကွက်များ

မြန်မာနိုင်ငံ အရှေ့မြောက်ပိုင်းတွင် တရားမဝင်သတ္တုတူးဖော်ရေးလုပ်ကွက်ပေါင်း များစွာ ရှိနေသည်ဟု သဘာဝပတ်ဝန်းကျင်အရေး လေ့လာစောင့်ကြည့်နေသည့် Global Witness က သြဂုတ်လ ၉ ရက်တွင် ထုတ်ပြန်ထားသည်။

လွန်ခဲ့သော နှစ်များက ဝေးလံသည့် မြန်မာနိုင်ငံ အရှေ့မြောက်ပိုင်းရှိ တရုတ်နယ်စပ်တွင် သတ္တုတွင်းအရေအတွက် အနည်းငယ်မျှသာ ရှိသော်လည်း ယခုအခါတွင်မူ စင်္ကာပူနိုင်ငံ၏ အရွယ်အစားမျှသော သတ္တုတွင်းများက ဒေသတွင်း ပြန့်ကျဲတည်ရှိနေသည်ဟု Global Witness ဆိုသည်။

သီးခြားတည်နေရာ ၃၀၀ နီးပါးတွင် သတ္တုတူးဖော်မှုအတွက် သတ္တုပျော်ရည် စုဆောင်းထားသည့် ကန်ပေါင်း ၂၇၀၀ ကျော် တွေ့ရှိသည်ဟု Global Witness က အခိုင်အမာ ပြောဆိုသည်။

ကချင်အထူးဒေသ ၁ ဟု ခေါ်သော မြန်မာနိုင်ငံ၏ တောင်ထူထပ်သည့် အဆိုပါဒေသသည် ကမ္ဘာပေါ်တွင် မြေရှားသတ္တုဒြပ်စင် အများဆုံးထုတ်လုပ်ရာ ဒေသတစ်ခု ဖြစ်နေသည်။

ကမ္ဘာလုံးဆိုင်ရာ ဝယ်လိုအားကြောင့် ဝေးလံပြီး ဥပဒေမဲ့နေသည့် ဒေသတစ်ခုအတွင်း ထိခိုက် ဆုံးရှုံးပျက်စီးမှုများသည် မိမိတို့၏ မြေယာများကို အသက်စွန့် ကာကွယ်နေကြသည့် ပြည်သူလူထုအတွက် နာကြင်ဖွယ် လက်တွေ့အခြေအနေဖြစ်သည်ဟု Global Witness က ထုတ်ပြန်ထားသည်။

တရားမဝင်မြေရှားသတ္တုတူးဖော်ရေးလုပ်ငန်းများကြောင့် ပတ်ဝန်းကျင်မြေထုနှင့် ရေအရင်းအမြစ်များကို အဆိပ်သင့်စေပြီး သဘာဝပတ်ဝန်းကျင်ဆိုင်ရာ ပျက်စီးမှုများ ပိုမို ဖြစ်လာနိုင်သည်ဟု သဘာဝပတ်ဝန်းကျင်ပညာရှင်များက သုံးသပ်ထားကြသည်။

စစ်အာဏာသိမ်းပြီး‌နောက်ပိုင်းတွင် တရားမဝင် သဘာဝသယံဇာတ ခိုးယူထုတ်လုပ်မှုများ သိသိသာသာ မြင့်တက်နေသည်ဟုလည်း Global Witness က ထောက်ပြထားသည်။ ၂၀၁၄ ခုနှစ်တွင် မြန်မာနိုင်ငံမှ တရုတ်နိုင်ငံသို့ မြေရှားသတ္တု တင်ပို့မှုသည် အမေရိကန်ဒေါ်လာ ၁ ဒဿမ ၅ သန်းမျှသာ ရှိသော်လည်း ၂၀၂၁ ခုနှစ်တွင် အမေရိကန်ဒေါ်လာ သန်း ၇၈၀ အထိ ရှိလာခဲ့သည်။